जत,(प्रतिनिधी)-
भाजप आणि काँग्रेसने आपल्या पहिल्या यादीतच जत विधानसभा मतदारसंघातील आपापल्या उमेदवारांची नावे जाहीर केल्याने अन्य इच्छूक मंडळींची धडपड थांबली असली तरी ही नाराज मंडळी काय पवित्रा घेतात, याकडे मतदारांचे लक्ष लागले आहे. तिसरा उमेदवार निवडणूक रिंगणात असणार हे निश्चित असले तरी तो दोन्हीकडील नाराज गटाकडून येणार की वंचित आघाडी आपला उमेदवार देणार,हाच प्रश्न बाकी आहे.
तिसरी आघाडी करून उमेदवार देण्याची खलबते चालली होती. आता त्याला आणखी पंख फुटतील की वंचित आघाडीला बळ दिले जाणार ,याची खमंग चर्चा सध्या सुरू असून यासाठी अशोक बन्नेनवर, माजी आमदार प्रकाश शेंडगे यांच्या नावाची चर्चा सुरू आहे. मागील विधानसभा निवडणुकीत विलासराव जगताप, विक्रम सावंत, प्रकाश शेंडगे अशी तिरंगी लढत झाली होती. मोदी लाटेत विलासराव जगताप विजयी झाले असले तरी विक्रम सावंत यांनी चांगली लढत देत पन्नास हजारांहून अधिक मते खेचली होती. सावंत यांना नातेवाईक असलेले डॉ. पतंगराव कदम यांची सर्वच दृष्टीने वरदहस्त होता. पण त्यांच्या निधनामुळे सावंत यांनी बाजू थोडी कमकुवत झाली आहे, पण मावसभाऊ व पलूस-कडेगाव मतदार संघातील काँग्रेसचे उमेदवार विश्वजीत कदम यांचे पाठबळ त्यांना मिळणार आहे. काँग्रेसचा मोठा गट सावंत यांच्या पाठीशी असला तरी नेहमीप्रमाणे राष्ट्रवादीचा एक गट विरोधाची भूमिका घेण्याच्या पवित्र्यात आहे. प्रदेशाध्यक्ष जयंत पाटील यांच्या कानटोचणीचा काही परिणाम या गटावर झाल्यास तालुक्यात तुल्यबळ लढती होण्यास मदत होणार आहे. तालुक्यात शिवसेना फारच मर्यादित आहे. त्यांच्या असण्या-नसण्याचा कोणालाच काही परिणाम होणार नाही. सध्याच्या परिस्थितीत तिसरा उमेदवार कोण असणार,यावर बरेच गणित अवलंबून असणार आहे.
No comments:
Post a Comment